एजेन्सी। भारतको कर्नाटक राज्यको पश्चिम बेङ्गलुरुमा एक नेपाली दम्पतीले घरमालिकलाई बेहोस बनाएर गहना र नगद लुटेको आरोप लागेको छ। पीडित ५४ वर्षीया स्त्री रोग विशेषज्ञ डा. ललिता डिसेम्बर ३ का बिहान आफ्नै शयनकक्षको ढोका नजिक बेहोस अवस्थामा फेला परेकी थिइन्।
परिवारका अनुसार उनीहरूले एक महिना अघि परिचित मध्यस्थकर्तामार्फत नेपालबाट आएको उक्त दम्पतीलाई घरेलु कामदारका रूपमा तीनतले घरको भुइँतलामा बस्नका लागि राखेका थिए।
घटना डिसेम्बर २ का राति भएको बताइन्छ। त्यही राति ललिताका छोरा निखिलले औषधि खाएर सुतेका थिए। बिहान उठ्दा आमालाई भुइँमा लडेको अवस्थामा भेटेपछि उनले कामदारहरू बेपत्ता भएको पत्ता लगाए। घरको सिसिटिभी फुटेजमा घरेलु कामदार विपेन्द्र आफ्ना साथीहरूसँग राति करिब ८:३० बजे घरमा प्रवेश गरेको र करीब १०:४५ बजे बहुमूल्य सामान बोकेर निस्केको देखिएको प्रहरीले जनाएको छ।
घटनापछि हराएको सूचीमा ५० ग्रामको मंगलसूत्र, २० ग्रामका चुरा, नगद रकम, मोबाइल फोनसहित अन्य बहुमूल्य सामानहरू रहेका छन्। डा. ललिताले पूर्ण होसमा फर्किएपछि दराजमा राखिएको नगदसमेत चोरी भएको पुष्टि गरिन्।
प्रहरीका अनुसार कामदार दम्पतीबारे परिवारले न्यूनतम विवरण मात्र संकलन गरेको र पहिचान कागजात जाँच नगरिएको पुष्टि भएको छ। व्याडरहल्ली प्रहरी स्टेसनमा भारतीय दण्ड संहिताको धारा ३८१ (कर्मचारीद्वारा मालिकको सम्पत्तिमा चोरी) अन्तर्गत मुद्दा दर्ता गरिएको छ।
प्रहरी उपाध्यक्ष (उत्तर–पश्चिम) डी.एल. नागेशले घरेलु कामदार राख्दा प्रमाणित विवरण संकलन नगर्नु नागरिकको ठूलो लापरबाही भएको टिप्पणी गर्दै फरार नेपाली दम्पतीको खोजी जारी रहेको जानकारी दिएका छन्।
प्रतिक्रिया