काठमाडौं । स्याङ्जामा रहेको अर्जुनचौपारी गाउँपालिका र दार्चुलामा रहेको अपिहिमाल गाउँपालिकाबीच भगिनी सम्बन्ध स्थापना तथा आपसी सहकार्यसम्बन्धी सम्झौता भएको छ ।
शुक्रबार काठमाडौंमा आयोजित एक कार्यक्रममा अर्जुनचौपारी गाउँपालिकाका अध्यक्ष प्रकाश तिवारी र अपिहिमाल गाउँपालिकाका अध्यक्ष भक्त सिंह ठेकरे बोहराले सम्झौतापत्रमा हस्ताक्षर गरे ।
सम्झौता अनुसार अर्जुनचौपारी गाउँपालिकामा १९ सय मिटर (हाई अल्टिच्यूड) को उचाइमा क्रिकेट रङ्गशाला सहित विविध पर्यटन, सांस्कृतिक र धार्मिक सम्पदाको संरक्षण, प्रवद्र्धन र सामाजिक सेवामा साझा पहल र अनुभव आदानप्रदान, युवा, महिला तथा समुदायलाई सशक्त बनाउने लगायतका बिषयमा सम्झौता भएको अपिहिमाल गाउँपालिका अध्यक्ष बोहराले जानकारी दिए ।
निर्माणाधिन क्रिक्रेट रंगशाला सोही पालिकामा जन्मथलो भएका चर्चित क्रिक्रेटर सन्दिप लामिछानेको सम्मानमा पालिकाले निर्माण गरिरहेको र उक्त क्रिक्रेट मैदानमा प्रतियोगिता सञ्चालन गरी विश्वमाझ अर्जुनचौपारी चिनाउने तयारी गरिरहेको तिवारीले बताए ।
यस्तै आर्थिक विकास, कृषि उत्पादन, व्यापार र स्थानीय रोजगारी सिर्जना, दीर्घकालीन सांस्कृतिक, सामाजिक र मैत्रीपूर्ण सम्बन्ध सुदृढ बनाउने सम्झौतामा उल्लेख छन् । सहकार्यका लागि दुबै पालिकाबाट संयोजकसहित भगिनी सम्बन्ध समन्वय समिति गठन गर्ने, वेबसाइट, सूचना प्रणाली, रिपोर्ट मार्फत नियमित जानकारी आदानप्रदान र श्रोत साधनको परिचालनका साथै प्राविधिक सहयोग गरिने अपिहिमाल गाउँपालिका अध्यक्ष बोहराले जानकारी दिए ।
सम्झौतामा पर्यटन, संस्कृति र धार्मिक सम्पदा राष्ट्रिय तथा अन्तर्राष्ट्रिय स्तरमा प्रबद्र्वनका लागि समेत सहकार्य गरिने छ । जसअन्तर्गत अर्जुनचौपारीमा रहेको नेपालकै पहिलो नवग्रह मन्दिर र अपिहिमाल पालिकामा रहेको अपि हिमालसहित अन्य पर्यटकीय गन्तब्य उच्च हिमाली पर्यटन, साहसिक र ट्रेकिङ मार्गको विकास र सुरक्षा, सांस्कृतिक कार्यक्रम, जात्रा उत्सव, मौलिक परम्पराहरूको संरक्षण, प्रवद्र्धन र पर्यटक सुरक्षाको लागि प्राविधिक तालिम, मार्ग र सुविधा विकासमा सहकार्य गरिने सम्झौता पत्रमा उल्लेख छ ।
नेपाल सरकारको स्थानीय सरकार सञ्चालन ऐन, २०७४ ले स्थानीय तहहरूबीच सहकार्य, समन्वय र साझेदारीलाई प्रोत्साहन गर्ने व्यवस्था गरेअनुरुप आफूहरुले यस्तो सम्झौता गरेको अर्जुनचौपारी गाउँपालिकाका अध्यक्ष तिवारीले बताए ।
प्रतिक्रिया