काठमाडौं। दक्षिण–पश्चिम बंगालको खाडीमा विकसित चक्रवात ‘दित्वा’को आंशिक प्रभावका कारण आज र भोलि (मंसिर १४–१५) देशका अधिकांश भू–भागमा आंशिकदेखि सामान्य बदली रहने मौसम पूर्वानुमान महाशाखाले जनाएको छ। तर, वर्षाको सम्भावना नरहेको महाशाखाले स्पष्ट गरेको छ।
महाशाखाका अनुसार चक्रवात ‘दित्वा’को बाहिरी प्रभाव नेपालसम्म पुगेकाले हाल देखिएको हल्का बदली स्वाभाविक भएको हो। मौसमविद् उज्ज्वल उपाध्यायका अनुसार उक्त आँधीको बाहिरी तहको बादल करिब तीन हजार किलोमिटर टाढा रहेको नेपालका हिमाली क्षेत्रमा समेत फैलिएको छ। उनका अनुसार आज देखिएको बादल वर्षा–सम्बन्धी नभएको र वर्षाको सम्भावना पनि नदेखिएको बताए।
यसैबीच, ‘दित्वा’ आँधीका कारण श्रीलंकामा ठूलो जनधनको क्षति भएको छ र मृत्यु हुनेको संख्या १५९ पुगेको छ।
महाशाखाले पूर्वी उच्च हिमाली क्षेत्र—विशेषगरी कञ्चनजंघा र सगरमाथा क्षेत्रमा भने पर्सि (मंसिर १६)सम्म हल्का हिमपातको सम्भावना रहेको जनाएको छ।
काठमाडौं उपत्यकाको तापक्रम क्रमशः घट्दै गएको छ। आइतबार बिहान पौने ९ बजे काठमाडौंको न्यूनतम तापक्रम ६.२ डिग्री सेल्सियस मापन गरिएको छ, जुन यस वर्षको दोस्रो सबैभन्दा कम न्यूनतम तापक्रम हो। यसअघि मंसिर १० गते ६.१ डिग्री सेल्सियस मापन गरिएको थियो। मंसिर १३ मा ६.७, र मंसिर १२ मा ६.५ डिग्री सेल्सियस न्यूनतम तापक्रम नापिएको थियो।
प्रतिक्रिया