बाजुरा । बाजुराको बडीमालिका नगरपालिकाले नगर स्थापना दिवस विविध कार्यक्रम गरेर मनाउने भएको छ । स्थापना दिवसका अवसरमा नगरपालिकाले स्थानीय संस्कृति झल्किने कार्यक्रमको आयोजना गर्ने भएको हो ।
नगरपालिकाले आफ्नो ११ औं ‘नगर स्थापना’ दिवसका अवसरमा बाजुराको कला, संस्कृति झल्किने विभिन्न कार्यक्रमको आयोजना गर्ने भएको छ । हरेक बर्ष भव्य रुपमा स्थापना दिवस मनाउँदै आएकोमा यो बर्ष पनि भव्य रुपमा स्थापना दिवस मनाईने नगरपालिकाले जनाएको छ ।
सुदूर तथा बाजुराको संस्कृतिलाई प्रमुख प्राथामिकतामा राखेर स्थापना दिवसका अवसरमा सामाजिक, संस्कृति झल्किने लगायतका कार्यक्रम गर्न लागिएको नगर प्रवक्ता तथा बडीमालिका नगरपालिका ७ का अध्यक्ष धर्मराज पाध्यायले बताए ।
उनका अनुसार नगरभित्रका ९ वटै वडाका स्थानीय कला, संस्कृति, रितिरिवाज, चालचलन, भेशभुषा, विभिन्न नृत्य हरुको प्रर्दशनी गरिने बताएका छन् । हरेक बर्ष फरक खाले कार्यक्रम गरेर स्थापना दिवस मनाईने गरिएको पाध्यायको भनाइ छ ।
दिवसका अवसरमा, नगरपालिकाको नगर गितमा स्थानीय कलाकारहरुबाट नृत्य प्रस्तुति, वडा स्तरिय झाँकी प्रर्दशन, १ नम्बर वडाको हरिनो नाच, २ वडाको महिला देउडा, ३ नम्बर वडाको विशुपर्वको गाथा, ४ वडाको विवाह मागल भाका, ५ को स्थानीय देउडा, वडा नम्बर ६ को परम्परागत देविदेवताका मागल ७ नम्बरको भोटेसेलो र ८ र ९ को अनन्ते गाथा तथा भुवाचाली गौरा आदीको प्रस्तुती गरिने छ ।
साथै स्थापना दिवसकै अवसरमा बडीमालिका नगरपालिकाको कलासंस्कृति : हाम्रो पहिचान बिषयमा मावि स्तरिय नृत्य प्रतियोगिताका साथै स्थानीय पहिरन सहित पञ्चेबाजा नाच देखाइने छ ।
त्यस्तै पालिकका कर्मचारी स्तरिय खुल्ला महिला तथा पुरुष भलिवल प्रतियोगिता समेत हुने भएको छ । सबै कार्यक्रम उत्कृष्ट हुनेहरुलाई उचित पुरस्कारको समेत व्यवस्था रहेको छ।
प्रतिक्रिया