काठमाडौं । मेक्सिकोमा जेनजी उमेर समुहले सरकार विरुद्ध गरेको आन्दोलनमा प्रहरी सहित १२० जना घाइते भएका छन् । मुलुक भित्र भइरहेको बढ्दो अपराध, भ्रष्टाचार र दण्डहीनता विरुद्ध जेनजी समूहद्वारा आन्दोलन गरिएको हो ।
मेक्सिकोका सार्वजनिक सुरक्षामन्त्री पाब्लो वाजक्वेजका अनुसार झडपमा १०० जना प्रहरी घाइते भएका छन भने २० जना आन्दोलनकारी घाइते भएका छन् ।
२० जना आन्दोलनकारी पक्राउ परेका छन भने थप २० जनालाई प्रशासनिक मामिलामा कारबाहीका लागि बुझाइएको उनले बताए । उनका अनुसार घाइते मध्ये ४० जना प्रहरीको अस्पतालमा उपचार गरिएको छ ।
विरोधको प्रतिक स्वरुप ‘वान पिस’ को झण्डा
प्रदर्शनकारीहरूले जापानी मंगा वन पिस को ‘स्ट्र ह्याट’ खरानी टोपी लगाएको खोपडी अंकित झण्डा फहराएका छन् । कार्टून पात्र देखिने उक्त झण्डा प्रदर्शनसँग मेल नखाएजस्तो देखिए पनि, जेनजी पुस्ताका आन्दोलनकारीका लागि यसको गहिरो प्रतीकात्मक अर्थ छ ।
विश्वभरका युवापुस्ता–केन्द्रित आन्दोलनमा देखापर्ने सांस्कृतिक प्रतीकहरूमध्ये वन पिस को जोली रोजर झण्डा हाल जेनजी आन्दोलनको साझा पहिचान बनेको छ । मेक्सिको सिटीमा राष्ट्रपति क्लाउडिया शाइनबौम बस्ने नेशनल प्यालेस वरिपरि लगाइएका बार हटाउने क्रममा हुड लगाएका प्रदर्शनकारी र प्रहरीबीच झडप भएको थियो । प्रहरीले स्थिति नियन्त्रणमा लिन अश्रु–ग्यास प्रयोग गरेको थियो ।
प्रदर्शनमा प्रयोग गरिएको झण्डा १९९७ मा प्रकाशित जापानी मंगा वन पिस का सिर्जनाकर्ता एइइचिरो ओडाले बनाएको कथाबाट प्रेरित हो । मंगामा मुख्य पात्र मन्की डी. लुफी र उनको ‘स्ट्र ह्याट क्रू’ स्वतन्त्रता, सपनाको खोजी र दमनकारी ‘वल्र्ड गभर्नमेन्ट’ विरुद्ध लड्ने कथामा केन्द्रित छन् ।
वन पिसका प्रशंसकहरूका अनुसार यो झण्डा सपनाको खोजी, अन्यायविरुद्धको विद्रोह र स्वतन्त्रताको प्रतीक हो । यही कारणले यो झण्डा एशियाका विभिन्न विरोध प्रदर्शनहरू—इन्डोनेसिया, फिलिपिन्स, नेपाल—देखि फ्रान्सको राजधानी पेरिससम्म युवापुस्ताको प्रतिरोधको चिन्हका रूपमा फैलिएको छ । -एएनआई
प्रतिक्रिया