काठमाडौं । भारतले पाकिस्तानले गरेको भनिएको गोप्य परमाणु परीक्षणबारे कडा आपत्ति जनाएको छ। भारतीय विदेश मन्त्रालयका प्रवक्ता रणधीर जैसवालले शुक्रबारको साप्ताहिक प्रेस ब्रिफिङमा पाकिस्तानका गोप्य र अवैध परमाणु गतिविधि त्यस देशको दशकौँ पुरानो परमाणु इतिहासको हिस्सा भएको टिप्पणी गरे।
जैसवालले पाकिस्तानको परमाणु इतिहास तस्करी, निर्यात नियन्त्रण उल्लङ्घन, गोप्य साझेदारी र ए क्यू खान नेटवर्कसँग जोडिएको स्पष्ट पारे। उनले पाकिस्तानको यस्तो गतिविधिले क्षेत्रीय तथा अन्तर्राष्ट्रिय सुरक्षा जोखिम बढाएको बताए।
उनको यो टिप्पणी अमेरिकी पूर्वराष्ट्रपति डोनाल्ड ट्रम्पको हालैको दाबीपछि आएको हो। ट्रम्पले एक अन्तर्वार्तामा पाकिस्तानसहित केही देशहरूले अन्तर्राष्ट्रिय निगरानीबाट बच्न भूमिगत रूपमा परमाणु परीक्षण गरिरहेको आरोप लगाएका थिए।
भारतले उक्त दाबीलाई गम्भीरतापूर्वक लिँदै अन्तर्राष्ट्रिय समुदायको ध्यान पाकिस्तानको परमाणु रेकर्डतर्फ आकर्षित गरेको जनाएको छ। भारतले लामो समयदेखि पाकिस्तानको परमाणु गतिविधिबारे विश्वव्यापी मञ्चहरूमा चिन्ता व्यक्त गर्दै आएको स्मरण गराएको छ।
जैसवालका अनुसार भारतले निरन्तर रूपमा अन्तर्राष्ट्रिय समुदायलाई पाकिस्तानको परमाणु नीति र त्यसको प्रसार सञ्जालबाट उत्पन्न हुन सक्ने खतराबारे सचेत गराउँदै आएको छ।
स्रोत: हिन्दुस्थान टाइम्स
प्रतिक्रिया