काठमाडौं — नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा)ले नयाँ कम्युनिस्ट केन्द्र निर्माणका लागि पाँच सदस्यीय वार्ता टोली गठन गरेको छ। पार्टीका प्रवक्ता खड्गबहादुर विश्वकर्माको नेतृत्वमा टोली गठन गरिएको केन्द्रीय सदस्य नारायण सीले जानकारी दिए।
उनका अनुसार टोलीले नेकपा (एमाले), नेकपा (माओवादी केन्द्र), नेकपा (एकीकृत समाजवादी)लगायत कम्युनिस्ट धारका दलहरूसँग वार्ता र आवश्यक रणनीति तयार गर्नेछ।
सीका अनुसार भदौ २३ र २४ गतेको ‘जेनजी आन्दोलन’पछि उत्पन्न राजनीतिक परिस्थितिलाई मध्यनजर गर्दै वार्ता टोली गठन गरिएको हो। उनले भ्रष्टाचार, बेथिति, विकृति र विसंगतिविरुद्ध नेकपा निरन्तर आवाज उठाउँदै आएको उल्लेख गरे।
नेकपाले नयाँ कम्युनिस्ट केन्द्र निर्माण गर्दा हालका शीर्ष नेतालाई सम्मानजनक स्थान दिँदै ऊर्जाशील नयाँ नेतृत्वलाई अघि सार्ने रणनीति बनाएको छ।
प्रतिक्रिया