काठमाडौं । नेपाल र बंगलादेशबीचको दोस्रो अन्तर्राष्ट्रिय रग्बी सिरिज काठमाडौंस्थित दशरथ रंगशालामा हुने भएको छ। नेपाल रग्बी संघले बिहीबार पत्रकार सम्मेलनमार्फत आगामी भदौ २९ देखि ३१ (सेप्टेम्बर १४–१५) सम्म सिरिज आयोजना हुने जानकारी दिएको हो।
सिरिजमा सेभेन्सका दुई र फिफ्टिन्सको एक गरी तीन खेल सञ्चालन हुनेछन्। यसअघि पहिलो संस्करण सन् २०२२ मा बंगलादेशको ढाकामा सम्पन्न भएको थियो।
संघका अनुसार पाहुना टोली बंगलादेश भदौ २८ (सेप्टेम्बर १३) मा नेपाल आइपुग्नेछ। प्रतियोगिताको अनुमानित बजेट ३५ लाख रुपैयाँ रहेको छ। विजेता टोलीलाई ट्रफी, मेडल र प्रमाणपत्र प्रदान गरिनेछ भने उपविजेतालाई मेडल र प्रमाणपत्र दिइनेछ। एक उत्कृष्ट खेलाडीलाई विशेष ट्रफीबाट पुरस्कृत गरिने संघले जनाएको छ।
सिरिजका लागि नेपाली टोली सातदोबाटोस्थित चर्च ब्वाइज युनाइटेडको मैदानमा प्रशिक्षणरत छ।
प्रतिक्रिया