झापा — राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले गैरआवासीय नेपाली (एनआरएन) को वंशजलाई नागरिकता निरन्तरता दिनुपर्ने माग गरेका छन्।
आइतबार (भदौ १५) झापाको बिर्तामोडमा पार्टी जिल्ला कार्यसमितिद्वारा आयोजित पत्रकार सम्मेलनमा लिङदेनले विदेशमा बसोबास गरिरहेका नेपालीलाई नेपालको समृद्धिमा जोड्न उनीहरूको सन्तानलाई पनि नागरिकतामा निरन्तरता दिनुपर्ने बताएका हुन्।
उनका अनुसार २०६३/६४ सालको राजनीतिक परिवर्तनपछि बनेको नागरिकता ऐनमा दोहोरो नागरिकता निषेध गर्ने प्रावधानले अवसर, अध्ययन तथा रोजगारीका लागि विदेश गएका नेपालीका वंशज प्रभावित भएका छन्।
लिङदेनले भने, “नेपालबाहिर पनि नेपाल छ, प्रवासमा रहेका नेपालीलाई पनि नेपालको चिन्ता हुन्छ।”
उनले विभिन्न देशमा दीर्घकालीन काम गर्ने नेपालीले त्यहाँको नियमअनुसार नागरिकता लिनुपर्ने बाध्यता भए पनि नेपालसँगको नागरिकता सम्बन्ध विच्छेद हुन नहुने तर्क गरे।
प्रतिक्रिया