काठमाडौं । सरकारले नेपाल प्रहरीको ३२औं महानिरीक्षक (आईजीपी) मा चन्द्रकुवेर खापुङलाई नियुक्त गर्ने निर्णय गरेको छ।
शुक्रबार बसेको मन्त्रिपरिषद् बैठकले खापुङलाई १९ भदौदेखि लागू हुने गरी आईजीपी बनाउने निर्णय गरेको हो। यसअघि हालका महानिरीक्षक दिपक थापा १८ भदौ राति १२ बजेदेखि अनिवार्य अवकाशमा जाने तय भएको छ। प्रधानमन्त्री केपी शर्मा ओली शनिबार चीन भ्रमणमा प्रस्थान गर्नुअघि बसेको मन्त्रिपरिषद् बैठकले प्रहरी नेतृत्वबारे टुंगो लगाएको हो।
खापुङ हाल प्रहरीको केन्द्रीय अनुसन्धान ब्यूरो (सीआईबी) का प्रमुख छन्। उनी थापासँगै इन्स्पेक्टर भर्ना भएका थिए। सोही ब्याचका बसन्तबहादुर कुँवर यसअघि आईजीपी भइसकेका थिए भने अरु सहकर्मीहरू उमेर हद तथा सेवा अवधिका कारण अवकाशमा गइसकेका छन्।
उनको ब्याचका अन्य एआईजीहरू कृष्णहरि शर्मा पोखरेल र लालमणि आचार्य पनि हालै अवकाशमा पुगेका कारण खापुङ आईजीपीका लागि एकल उम्मेदवार बनेका थिए।
नयाँ प्रहरी ऐन जारी भए खापुङको सेवाअवधि ६ महिना थपिन सक्नेछ। तर, हालको व्यवस्था अनुसार उनले ३० वर्षे सेवा अवधिका कारण २६ कात्तिक राति १२ बजेदेखि अनिवार्य अवकाश लिनुपर्नेछ।
प्रतिक्रिया