काठमाडौं – नेपाल स्टक एक्सचेन्ज (नेप्से)मा सूचीकृत बैंक तथा वित्तीय संस्था र बिमा कम्पनीको बजार पुँजीकरण घट्दै गएको छ भने जलविद्युत कम्पनीको हिस्सा बढ्दै गएको छ।
नेप्सेका अनुसार, असार मसान्तसम्म बैंक तथा वित्तीय संस्थाको बजार पुँजीकरणको हिस्सा ५४.१ प्रतिशतमा झरेको छ, जुन अघिल्लो समय ७१ प्रतिशतभन्दा माथि थियो। जलविद्युत कम्पनीको हिस्सा १५.३ प्रतिशत पुगेको छ। नेपाल धितोपत्र बोर्डमा हाल ३७ जलविद्युत कम्पनीको १८ अर्ब २२ करोड रुपैयाँबराबरको सेयर पाइपलाइनमा छ।
अन्य समूहको हिस्सा यसप्रकार छ: लगानी कम्पनी ७.७ प्रतिशत, उत्पादन तथा प्रशोधन उद्योग ५.४ प्रतिशत, व्यापारिक संस्था ५.० प्रतिशत, होटेल २.७ प्रतिशत, र अन्य समूह ९.८ प्रतिशत।
असार मसान्तसम्म नेप्सेमा २७२ कम्पनी सूचीकृत छन्। यसमा १३२ बैंक तथा वित्तीय संस्था र बिमा कम्पनी, ९१ जलविद्युत कम्पनी, २३ उत्पादन तथा प्रशोधन उद्योग, ७ होटेल, ७ लगानी कम्पनी, ४ व्यापारिक संस्था, र ८ अन्य समूहका कम्पनी छन्। अघिल्लो वर्ष असार मसान्तमा सूचीकृत कम्पनीको संख्या २७० थियो।
बजार पुँजीकरण कुल गार्हस्थ उत्पादन (जीडीपी) को अनुपात ०८१ असार मसान्तमा ६२.२५ प्रतिशत थियो, जुन ०८२ असार मसान्तमा ७६.२५ प्रतिशत पुगेको छ।
गत आर्थिक वर्ष २०८१/०८२ मा ८३ अर्ब १९ करोड रुपैयाँबराबरको धितोपत्र नेप्सेमा सूचीकृत भएको थियो। यसमा ४० अर्ब २१ करोडको साधारण सेयर, २४ अर्ब ४२ करोडको बोनस सेयर, १३ अर्ब २३ करोडको हकप्रद सेयर, १ अर्ब २५ करोडको म्युचुअल फन्ड, ११ करोड २० लाखको एफपीओ, र ३ अर्ब ९६ करोडको अन्य सेयर समावेश छन्।
प्रतिक्रिया