काठमाडौं — अमेरिकी राष्ट्रपति डोनाल्ड ट्रम्पले यसै साताको शुरुमा रुस र युक्रेनलाई प्रत्यक्ष वार्तामा ल्याउन सफलता पाएको दाबी गरेका थिए । उनले रुसी राष्ट्रपति भ्लादिमिर पुटिन र युक्रेनी राष्ट्रपति भोलोदिमिर जेलेन्स्कीबीच भेटघाट तय भएको घोषणा गरेका थिए ।
तर, चार दिनमै पुटिनको अडानले ट्रम्पको पहलमा ठुलो धक्का पुगेको छ । रुसी विदेशमन्त्री सर्गेई लाभरोभले भनेका छन्, “कुनै भेटघाट तय भएको छैन… शिखर सम्मेलनका लागि एजेन्डा तयार हुनुपर्ने हो, तर यो अहिलेसम्म बनेको छैन।”
ट्रम्पले चेतावनी दिएका छन् कि यदि प्रत्यक्ष वार्ता नभएमा उनले दुई हप्ताभित्र नयाँ कदम चाल्नेछन्, जसमा सम्भावित रुपमा रुसमाथि थप प्रतिबन्ध वा कर लगाउने कुरा पनि सामेल हुनेछ ।
यसबीच, रुसले पछिल्लो दिन पश्चिमी युक्रेनमाथि ठूलो हवाई आक्रमण गरेको छ, जसले ट्रम्पको कूटनीतिक दाबीलाई थप कमजोर बनाएको छ ।
युरोपेली नेताहरूले ट्रम्पको पहललाई सतर्क आशासहित हेरिरहेका छन्, तर युरोपेली संघकी विदेश नीति प्रमुख काजा कालासले पुटिनको प्रस्तावलाई “जाल” भन्दै चेतावनी दिएकी छन् । उनका अनुसार, रुससँग सम्झौता गर्नु भनेको आक्रमणकारीलाई पुरस्कृत गर्नु हो ।
प्रतिक्रिया