ट्रम्प प्रशासनले पाँच करोड ५० लाख भिसावाहकहरूको समीक्षा शुरू गर्यो

काठमाडौं – अमेरिकी राष्ट्रपति डोनाल्ड ट्रम्पको प्रशासनले अमेरिकामा आधिकारिक भिसा लिएर बसिरहेका पाँच करोड ५० लाख विदेशीहरूको भिसा रेकर्डको समीक्षा सुरु गरेको छ। अमेरिकी विदेश मन्त्रालयले बिहीबार (२१ अगस्ट) यस सम्बन्धमा जानकारी दिँदै, सबै भिसावाहकको आप्रवासन नियम उल्लंघन भए नभएको जाँच हुने जनाएको छ। उल्लंघन पुष्टि भएमा उनीहरूको भिसा रद्द गरिनेछ र आवश्यक परेमा मूल देशमा फिर्ता पठाइनेछ।

विदेश मन्त्रालयले उल्लंघनका संकेतमा भिसाको अवधि भन्दा बढी समय अमेरिकामा बस्नु, आपराधिक गतिविधिमा संलग्नता, सार्वजनिक सुरक्षा जोखिम, आतंकवादी गतिविधि वा आतंकवादी संगठनलाई सहयोग जस्ता विषयहरू समावेश हुने बताएका छन्। मन्त्रालयले सबै उपलब्ध सूचनाको समीक्षा गरिने बताए, जसमा पुलिस र आप्रवासन रेकर्ड, सामाजिक सञ्जाल, र भिसा जारी भएपछि भेटिएका सम्भावित अयोग्यता सम्बन्धी जानकारीहरू समावेश हुनेछन्।

ट्रम्प प्रशासनले अवैध रूपमा बसिरहेका आप्रवासी मात्र नभई विद्यार्थी र आगन्तुक भिसामा रहेका व्यक्तिहरूलाई पनि लक्षित गर्दै आएको छ। नयाँ निर्देशिकाले यस समीक्षा प्रक्रियालाई व्यापक बनाएको संकेत दिन्छ। गृह सुरक्षा मन्त्रालयका अनुसार, गत वर्ष अमेरिकामा १.२८ करोड ग्रीन कार्डधारी र ३६ लाख अस्थायी भिसावाहक रहेका थिए।

विदेशी ट्रक चालक भिसामा रोक
अमेरिकाले सबै विदेशी ट्रक चालकका लागि वर्कर भिसा जारी गर्न तत्काल रोक लगाएको छ। अमेरिकी विदेशमन्त्री मार्को रुबियोले यो घोषणा गर्दै, सडकमा प्रत्येक चालकले उच्चतम मापदण्ड पूरा गरेको सुनिश्चित गर्न आवश्यक भएको बताएका छन्। रोक भारतबाट अवैध रूपमा अमेरिका आएका हरजिन्दर सिंहको दुर्घटनासँग सम्बन्धित छ, जसमा तीन जनाको मृत्यु भएको थियो।

भिसा समीक्षा प्रक्रिया विस्तार
ट्रम्प प्रशासनले भिसा आवेदनकर्तामाथि व्यक्तिगत अन्तर्वार्ता अनिवार्य गर्ने लगायत थप प्रतिबन्ध लगाउँदै आएको छ। प्रारम्भमा प्यालेस्टाइन समर्थक वा इजरायल विरोधी गतिविधिमा संलग्न विद्यार्थीहरूलाई लक्षित गरिएको थियो, तर अब सबै भिसावाहकको समीक्षा व्यापक रूपमा हुने छ। समीक्षा प्रक्रिया अन्तर्गत सामाजिक सञ्जाल, अमेरिकी तथा मूल देशका कानुन प्रवर्तन रेकर्ड, र अमेरिकी कानून उल्लंघनको विवरण जाँचिनेछ।

विदेश मन्त्रालयका अनुसार, यस वर्ष ट्रम्प प्रशासनले विगत वर्षको तुलनामा दुई गुणा बढी भिसा र लगभग चार गुणा बढी विद्यार्थी भिसा रद्द गरेको छ।

मानवीय भिसा र विद्यार्थी भिसामा कडाइ
ट्रम्प सरकारले अस्थायी संरक्षित स्थिति (TPS) अन्तर्गत अमेरिकामा बस्ने मानिसहरू र विद्यार्थी भिसावाहकमाथि पनि कडाइ बढाएको छ। यस वर्षको सुरुमा करिब ६ हजार विद्यार्थीको भिसा रद्द गरिएको थियो, विशेष गरी प्यालेस्टाइनको पक्षमा विरोध–प्रदर्शनमा सहभागी भएका विद्यार्थीहरूलाई लक्षित गर्दै।