काठमाडौं । गत चैत १५ गते काठमाडौंको तीनकुनेमा भएको घटनाको निष्पक्ष छानविन र बिना कारण पक्राऊ परेकाहरुको रिहाइको माग गर्दै राष्ट्रिय प्रजातन्त्र पार्टी (राप्रपा) ले दबावमूलक प्रदर्शन गरेको छ ।
शुक्रवार राप्रपाले तीनकुने घटनाको निष्पक्ष छानविन गर्न राप्रपाका वरिष्ठ उपाध्यक्ष रविन्द्र मिश्र र महामन्त्री डा.धवल शमसेर राणालगायत बन्दीहरू रिहाई, मृतकहरूलाई शहीद घोषणालगायतका माग राखेर दबावमूलक प्रदर्शन गरेका हुन् ।
प्रदर्शनपछिको सभामा बोल्दै राप्रपाका नेता प्रकाश चन्द्र लोहनीले देशमा शुसासनका नाममा दुशासकहरु बढेको बताए । उनले सत्तामा बसेकाहरुले जनता बेचेको आरोप पनि लगाए ।
उनले भने, ‘यो राष्ट्रमा सुशासन होइन कुशासन बढेको छ । दुशासकहरु धेरै बढेका छन् । जसले गर्दा अर्बौं रुपैंयाँ नेपाली जनता ठगिएका छन् । नेपालीहरुलाई विदेशी बनाएर सत्तामा बस्नेले बेचेका छन् ।’
उनले प्रजातन्त्रको नाममा राष्ट्रको सम्पत्तिको दुरुपयोग गरिरहेको पनि बताए ।
‘प्रजातन्त्र भनेको गरिव जनताको हित गर्ने हो । त्यहाँ भुई मान्छेको हित गर्ने हो तर त्यो नभएर सिमित व्यक्तिको नाममा राष्ट्रको सम्पत्तिको दुरुपयोग भएको छ । प्रजातन्त्रको नाममा यसो गर्न पाइँदैन्,’ उनले भने ।
प्रदर्शन काठमाडौंको सुन्धारादेखि शान्तिबाटिकासम्म पुगेर कोणसभामा परिणत भएको थियो ।
प्रदर्शनकारीहरुले सरकारको विरोधमा नाराबाजी गर्दै झुटा मुद्दा खारेज हुनुपर्ने, राज्य आतङ्क बन्द गरिनुपर्ने, निष्पक्ष न्यायिक आयोग गठन गर्नुपर्ने, नागरिक स्वतन्त्रता कायम गर्नुपर्नेलगायतका माग गरेका छन् ।
प्रतिक्रिया