काठमाडौं । कृषि तथा पशुपक्षी विकासमन्त्री रामनाथ अधिकारीले मुलुकको कृषि क्षेत्रमा कोही एक्लैले केही गर्न नसक्ने भन्दै समग्र निजी क्षेत्रको साथ अपरीहार्य रहेको बताउनुभएको छ ।
कर्पोरेट मिडियाले बिहीबार राजधानीमा आयोजना गरेको ‘कर्पोरेट बिजनेश अवार्ड, २०२५’ समारोहलाई सम्बोधन गर्नुहुँदै उहाँले कृषि उत्पादनमा मुलुकलाई आत्मनिर्भर बनाउन निजी क्षेत्रको साथ खोज्नुभएको हो ।
‘सरकार वा निजी क्षेत्र एक्लैले कृषि क्षेत्रमा लगानी गरेर अपेक्षित प्रतिफल पाउन सकिदैनँ । यसमा निजी क्षेत्रको सहयोग जरुरी छ,’ मन्त्री अधिकारीले भन्नुभयो, ‘निजी क्षेत्र, व्यक्तिगत लगनशीलता, सहकारी तथा बैंकवित्तहरू र सबै खाले सामाजिक संस्थाहरूको लगानी कृषिमा जरुरी छ ।’
सबै तह र तप्काहरू एकैठाउँ रहँदा मात्रै कृषिमा सफलता हासिल गर्न सकिने चर्चा गर्नुहुँदै उहाँले त्यसैका लागि सरकारले लगानी दशक घोषणा गरेको स्पष्ट गर्नुभयो । मन्त्री अधिकारीले भन्नुभयो, ‘सबै जना एक ठाउँमा बसौँ, कसैको भर नपरौँ । हाम्रो दायित्व हामी सबैको साझा हो भन्ने ढङ्गबाट सोच बनाएको खण्डमा सिङ्गो नेपाली आत्मनिर्भरतामा रम्न सक्छ । आयातको भरले मात्रै हामी टिक्न हुँदैन । निर्यात गर्न सक्ने क्षमता हामी सँग भन्ने कुरा विस्तारै देखिँदै अआएको छ । यसतर्फ सबैको सक्रिय सहयोगका लागि आग्रह गछुै र कर्पोरेट मिडिया पनि यस सन्दर्भमा नजिकको सहयोगी संस्था बन्न सकोस् । यसमा हामी सबैले सघाउ पुर्याउन सकौँ ।’
नेपाल र नेपालीको पहिलो पहिचान नै कृषिप्रधान देशको नागरिक भएको भन्नुहुँदै उहाँले आफ्नो पहिचानलाई कायम राख्दै गरिमा बढाउन समेत सबै एकजुट भएर लाग्नुपर्नेमा उहाँले जोड दिनुभएको छ ।
यस्तै, उहाँले उद्योगी व्यवसायीहरूको समस्याहरू सम्बोधन गर्नेगरी सरकारले कानुनहरू निर्माण गरेको बताउनुभएको छ । ‘पछिल्लो चरण नेपाल सरकारको तर्फबाट जुन कानुनहरू निर्माण भएका छन् त्यसले आम उद्योगी व्यवसायी, निजी क्षेत्रका सम्पूर्ण संस्था र व्यक्तिहरू कम्तिमा खुसी हुनुभएको छ । आगामी दिनमा विगतको जस्तो कठिन परिस्थिति सृजना नहोस् भनेर सरकारले त्यो व्यवस्था गरेको हो,’ उहाँले भन्नुभयो ।
बजारलाई स्वच्छ र स्वस्थ बनाउनका लागि उद्योगी व्यवसायीले पछिल्लो चरणमा देखाउनुभएको उदारताको मुक्तकण्ठले प्रशंसा गर्नुहुँदै मन्त्री अधिकारीले उद्योगी–व्यवसायीले व्यावसायिक धर्म निर्वाह गरेको कारणले बजार मात्र होइन देश र जनतालाई नै ठूलो सहयोग पुगिरहेको चर्चा गर्नुभयो । सरकारले खुकुलो ऐन ल्याएर लगानीको विश्वास बढाएका कारण निजी क्षेत्रमा नयाँ रक्तसञ्चार भएको उहाँको भनाइ थियो ।
कर्पोरेट मिडियाले आफ्नो सामाजिक उत्तरदायित्व निर्वाह गर्दै उद्योगी–व्यवसायीलाई ऊर्जा प्रदान गर्न वर्षेनि आयोजना गर्दै आएको ‘कर्पोरेट बिजनेश अवार्ड’ले पनि उद्योग व्यवसायको क्षेत्रमा स्वच्छ र स्वस्थ वातावरण निर्माणका महत्वपूर्ण भूमिका खेल्ने विश्वास मन्त्री अधिकारीले व्यक्त गर्नुभयो । अवार्डले उद्योगी–व्यवसायी मात्र नभइ समाज र देशलाई नै राम्रो दिशातर्फ डोर्याइरहेको भनाइ उहाँको थियो ।
कर्पोरेट मिडिया ग्रुपले बिहीबार १७औँ संस्करणको ‘कर्पोरेट बिजनेश अवार्ड, २०२५’ भव्य रूपमा सम्पन्न गरेको छ । यो संस्करणमा ११ वटा विधामा २४ वटा अवार्ड र एक जनालाई लाइफटाइम एचिभमेन्ट अवार्ड प्रदान गरिएको छ ।
प्रतिक्रिया