काठमाडौं । राष्ट्रिय निजी तथा आवासीय विद्यालय एसोसिएसन नेपाल(प्याब्सन) को पूर्वप्राथमिक विद्यालय पाठ्यक्रम विकास कार्यशाला सम्पन्न भएको छ ।
गत बुधबारदेखि काठमाडौंमा सुरु भएको तीन दिने कार्यशाला गोष्ठी शुक्रबार सम्पन्न भएको हो ।
कार्यशालामा देशभरका पूर्व प्राथमिक शिक्षाका विज्ञ, निजी विद्यालयका संस्थापक प्रिन्सिपलहरु तथा काठमाडौं विश्वविद्यालयका प्राध्यापकहरूको सहभागिता रहेको प्याब्सनले जनाएको छ ।
प्याब्सनका अनुसार कार्याशालाको उद्देश्य २१औं शताब्दी पुर्व प्राथमिक तहको पाठ्यक्रम सहजीकरणलाई आधुनिक र प्रभावकारी बनाउन, शिक्षण पद्धतिहरूलाई सुधार गर्न र बालबालिकाको सवाङ्गीण विकासमा मद्दत गर्ने नयाँ दृष्टिकोणहरूको परिचय गराउनु रहेको छ ।
कार्यशालामा सहभागीहरूले पूर्वप्राथमिक विद्यालय शिक्षा क्षेत्रको विकास, नविनतम सिद्धान्त, विधि, प्रक्रिया, उपयोगिता र शैक्षिक सामग्रीहरूको प्रयोगबारे अन्तरक्रिया गरिएको प्याबसनले जानकारी दिएको हो ।
कार्यशालामा काठमाडौं विश्वविद्यालयका विशिष्ट प्राध्यापकहरू र शिक्षा विज्ञहरुले पाठ्यक्रम विकासका लागि नेपालको इसीडी पाठ्यक्रम ० देखि ८ वर्षका उमेर समूहका बालबालिकाहरुलाई आधार मानेर वर्तमान परिवेशमा निजी विद्यालयहरुले संचालन गदै आएका २–३, ३–४, ४–५, ५–६, ६–७ र ७–८ वर्ष उमेर समुहका बालबालिकाहरुका लागि छुट्टाछुट्टै उमेर समूहको पाठ्यक्रम निर्माण गर्न आवश्यक सल्लाह, सुझाव र मार्गदर्शन गरिएको अवसरमा बालबालिकाको शारीरिक, सामाजिक, संवेगात्मक र ज्ञानात्मक विकासमा सहायक पाठ्यक्रमको खाका तयार गरिएको छ ।
कार्यशालामा सहभागीहरूलाई शैक्षिक अनुसन्धान, अभिप्रेरणात्मक कक्षाहरू र गतिशील गतिविधिहरू प्रदान गरिएको छ । यसले नेपालको पुर्व प्राथमिक शिक्षा प्रणालीमा समग्र सुधार ल्याउने र आगामी वर्षहरूमा थप गुणस्तरीय शिक्षा उपलब्ध गराउने अपेक्षा गरिएको छ ।
काठमाडौं विश्वविद्यालयको सहकार्यमा नेसनल प्याब्सनद्वारा निर्माण गरि प्रस्ताव गरिने पाठ्यक्रमलाई पाठ्यक्रम विकास केन्द्रमा आवश्यक अनुमति तथा स्वीकृतिका लागि पहल गरिने र देशभर कार्यान्वयन गर्नका लागि प्रशिक्षण प्रशिक्षकहरु उत्पादन गरी हरेक विद्यालयका शिक्षकहरुलाई तालिम दिएर शैक्षिक विकासका कार्यक्रमहरू सञ्चालन गर्ने प्याबसनको योजना छ ।
प्रतिक्रिया