महिलाको शव जमिनमा  गाडिएको अवस्थामा फेला

रौतहट । रौतहटको बलेरी जंगलमा एक महिलाको शव जमिनमा  गाडिएको अवस्थामा फेला परेको छ । वृन्दावन नगरपालिका–१ निवासी फूलमतिया देवीको शव प्रहरीले बलेरी जंगलमा गाडिएको अवस्थामा फेला परेको हो ।

जिल्ला प्रहरी कार्यालय रौतहटका प्रवक्ता दीपककुमार रायका अनुसार महिला बेपत्ता भएको उजूरी परिवारले प्रहरीमा दिएपछि अनुसन्धान सुरु गरिएको थियो ।

महिलाको खोजीका क्रममा तालिम प्राप्त कुकुरको सहयोगमा लिइएको उनले जानकारी दिए । सोही कुकुरको सहयोगमा खोजी गर्ने क्रममा जंगलमा गाडिएको अवस्थामा बिहीबार शव फेला पारेको रौतहट प्रहरी प्रवक्ता रायले बताए ।

परिवारका सदस्य अनुसार गत चैत १४ गतेदेखि महिला बेपत्ता भएकी थिइन् । प्रहरीले घटनाका बारेमा आवश्यक अनुसन्धान गरिरहेको जनाएको छ । घटनालाई रहस्यमय भन्दै प्रहरीले हत्या गरिएको हुन सक्ने आशंकामा दुई जनालाई पक्राउ गरेको जिल्ला प्रहरी कार्यालय रौतहटले जनाएको छ ।