चैती छठ : साँझ अस्ताउदो सूर्यलाई अर्घ दिइयो

रौतहट । चैती छठ पर्वको मुख्य दिन आज (बिहीबार) साँझ ब्रतालुहरुले अस्ताउदो सुर्य र छठी मातालाइ अर्घ दिएका छन् ।
ब्रतालुहरुले यहाको बाग्मती, बकैया, चादी नदि र पोखरी तथा जलाशय पुगी अस्ताउदो सुर्यलाई अर्घ दिएका हुन् ।

नदि, पोखरी तथा जलाशय सरसफाइ गरि बेहुली झैं सिङ्गगारीएको थियो । गरुडा नगरपालिका वडा न.४ मा रहेको जलाशयमा पुगेर अस्ताउँदो सुर्यलाई अर्घ दिएको स्थानीय रमेश यादवले बताए ।

उनका अनुसार चैत शुक्लपक्षमा चार दिन सम्म मनाइने चैती छठ पर्वको तेश्रो दिन षष्ठी तिथीलाई छठको मुख्य दिन मानिन्छ ।

छठ पर्वको अन्तिम दिन सप्तमी तिथी, भोलि(शुक्रबार) बिहान ब्रतालुहरुले फेरी छठघाटमा पुगेर उदाउदो सुर्य र छठीमातालाइ अर्घ दिएपछि छठ पूजा विधीवत रुपमा समापन हुने उनको भनाइ छ ।

गत मंगलबार देखि विधीवत रुपमा चैती छठ पर्व सुरु भएको हो । सुर्य भगवान र छठी मातालाइ पूँजापाठ र अर्घ दिनका लागि गहुँ वा चामलको पिठोबाट ठेकुवा बनाउने गरिन्छ ।

यस्तै मुला, गाजर, बेसारको हरियो बेर्ना, ज्यामिर, नरिवल, सुन्तला, केरा, स्याउ, पानी सिंगडा, सुथनी, उखु लगायतका फुलफुल पनि सुर्य भगवान र छठी मातालाइ अर्घ दिने गरिन्छ । चैती तराई मधेशबासीको महान् चाड छठ पर्व कात्तिक र चैतमा गरि वर्षमा दुई पटक मनाउने गरिन्छ ।