सरकारको जग्गा एक इन्च पनि चाहिँदैन : डा.केदारनरसिंह

काठमाडौं । नेपाल चिकित्सक संघका पूर्वअध्यक्ष एवम कांग्रेस नेता डा.केदारनरसिंह केसीले आफूले सरकारको जग्गा एक इन्च समेत प्रयोग नगरेको दाबी गरेका छन् ।

तारकेश्वर नगरपालिका–९, मनमैजुस्थित लोकतान्त्रिक चोकको जग्गा हड्पेको भन्दै संसदमा प्रश्न उठेपछि उनले शनिबार पत्रकार सम्मेलन गर्दै सरकारी जग्गा केदारनरसिंहले कब्जा ग¥यो भनेर अफवाह फैलाइएको पनि बताए ।

उनले भने, ‘मलाई सरकारको जग्गा एक इन्च पनि चाहिँदैन । यसरी आरोप लगाउँदैमा म डराएर बस्नेमा पर्दिन । तर सहयोग, समन्वय, सद्भावको लागि सधैं तयार छु । सरकारी जग्गा केदारनरसिंहले कब्जा ग¥यो भनेर अफवाह फैलाइयो । बास्तवमा यो दुर्भाग्यपूर्ण र अत्यन्त संवेदनशिल छ । संविधान सभाका युवा साथीहरुले सत्यतथ्य नबुझी जुन अभिव्यक्ति दिनुभयो त्यो वास्तवमै युवाहरुकै लागि कंलक हो । अथवा युवाहरुको लागि अत्यन्तै दुर्भाग्य हो । किनभने जानीबुझी मात्र अभिव्यक्ति दिनुपर्छ ।’

साथै उनले ६२ नम्बर कित्ताको जग्गा मालपोत कार्यालयले नै आफ्नो नाममा रहेको क्लियर समेत गरिसकेको बताए । उनले ६३ नम्बर कित्ताको जग्गा सरकारको नाममा ६२ र ६१ कित्ताको जग्गा श्रीमती र आफ्नो नाममा रहेको बताए ।

उनले भने, ‘६२ नम्बर कित्ताको जग्गामा मालपोत कार्यालय क्लियर छ । जो मेरो नाममा छ तर ६३ नम्बर कित्ताको जग्गा सरकारको नाममा छ । यो पनि क्लियर छ । ६१ नम्बरको कित्ता मेरो श्रीमतीको नाममा छ ।

६१ कित्ताको जग्गामा तीन आना दुई पैसा दाम छ । मालपोतले केही जग्गा स्क्वायरफिट सट्टापट्टा गरेको हो । जसमा मेरो श्रीमतीको नामको ६१ नम्बरको कित्ताबाट केही जग्गा सार्वजनिकमा हालेर अर्थात सडकमा हालेर ६२ नम्बर कित्ता मेरो नाममा हालेको हो ।’