मकवानपुर । हेटौंडा भेट्रान्स कप फुटबल प्रतियोगिताको दशौँ संस्करण यही फागुन २२ देखि सुरु हुने भएको छ । हेटौंडा भेट्रान्स क्लबको आयोजनामा फागुन २२ देखि २६ गतेसम्म हेटौंडा–४ स्थित हुप्रचौर खेल मैदानमा दशौँ राष्ट्रिय भेट्रान्स कप ८ ए साइड रनिङ शिल्ड फुटबल प्रतियोगिता हुन लागेको हो ।
प्रतियोगिताबारे जानकारी दिने उद्देश्यले आइतबार आयोजित पत्रकार सम्मेलनमा बोल्दै संयोजक मणिराज गौतमले ४५ वर्ष माथि उमेर समूहमा खेलाइने प्रतियोगितामा १६ वटा टीम सहभागी हुने बताए । झण्डै १२ लाख रुपैयाँ खर्चको अनुमान गरिएको प्रतियोगितामा प्रथम नगद पुरस्कार १ लाख ५० हजार ५ सय ५५ र द्वितीय नगद पुरस्कार ७५ हजार ५ सय ५५ राखिएको छ ।
त्यस्तै, सर्वश्रेष्ठ कोचलाई ५ हजार, उत्कृष्ट फरवार्डलाई ५ हजार, उत्कृष्ट गोलरक्षकलाई ५ हजार, उत्कृष्ट डिफेन्सलाई ५ हजार, उत्कृष्ट मिडफिल्डरलाई ५ हजार र म्यान अफ द सिरिजलाई १० हजार रुपैयाँ नगद पुरस्कार राखिएको आयोजकले जनाएको छ ।
वीरगञ्ज युथ भेट्रान्स पर्सा, सिमरा भेट्रान्स बारा, चितवन भेट्रान्स चितवन, बगरभाइखलक भेट्रान्स पोखरा, एबीसी भेट्रान्स पोखरा, बुटवल भेट्रान्स रुपन्देही, थापागाउँ भेट्रान्स काठमाडौँ, किंगकम भेट्रान्स काठमाडौँ, बौद्ध भेट्रान्स काठमाडौँ, फ्रिडमफाइटर भेट्रान्स काठमाडौँ, हेटौंडा भेट्रान्स, नागस्वती भेट्रान्स हेटौँडा, बानेश्वर फ्रेन्डसीप भेट्रान्स काठमाडौँ, एन जे.जे.भी.भी. सिमरा सहित १६ वटा क्लब प्रतियोगितमा सहभागी हुनेछन् ।
प्रतिक्रिया