चाबहिलको इन्टेरियर गोदाममा आगलागी

काठमाडौं । काठमाडौंको चाबहिलस्थित सरस्वतीनगरमा रहेको एक इन्टेरियर गोदाममा आगलागी हुँदा लाखौँको क्षति भएको छ। आइतबार दिउँसो आगो लागेको सो गोदाम आर्ट्स इन्टरनेसनल प्रालिको रहेको थियो।

आगलागीका कारण गोदाममा रहेको फर्निचर, सजावटका सामग्री, विद्युतीय उपकरण र प्लाइवुडजस्ता सामग्री जलेर पूर्ण रुपमा नष्ट भएका छन्। आगलागीको प्रभावले आसपासका केही अन्य घरमा पनि सामान्य क्षति पुगेको बताइएको छ।

नेपाल सेना, प्रहरी र सशस्त्र प्रहरीको समन्वयमा उपत्यकाका तीन जिल्लाका दमकल टोलीले करिब दुई घण्टापछि आगो नियन्त्रणमा लिएका थिए।

आर्ट्स इन्टरनेसनलका सञ्चालक सञ्जीव भण्डारीले आगलागीको समयमा गोदाममा कुनै पनि कर्मचारी नभएको जानकारी दिए। “आगो लागेको समयमा गोदाममा कोही कामदार थिएनन्। आगो कसरी लागेको भन्ने कुरा अझै स्पष्ट छैन, तर ठूलो क्षति भएको छ,” उनले भने।

प्रहरीले आगलागीका कारण भएको वास्तविक क्षतिको विवरण भने अहिले सम्म सार्वजनिक गरेका छैनन्।