काठमाडौं । आम जनता पार्टीका अध्यक्ष प्रभु साहले वर्तमान सरकार ‘लुटेराहरूको सरकार’ भएको आरोप लगाएका छन् । काठमाडौंमा मंगलबारदेखि सुरु भएको पार्टीको केन्द्रीय समितिको बैठकको उद्घाटन सत्रमा अध्यक्ष साहले वर्तमान सरकारले जनताका लागि केही गर्न नसक्ने बताए ।
प्रमुख पार्टीका शीर्ष नेताको सत्ता स्वार्थले सबैलाई लज्जित बनाएको उनको भनाइ छ । साहले अति राजनैतिक गतिविधिले प्रदेश र स्थानीय सरकार सहजरूपमा चल्न नसकेको पनि बताए ।
उनले राज्यको मातहत रहेका संस्थाहरूलाई दोहन गरेर डुबाउन लागिपरेको पनि आरोप लगाए ।
“जनता केही पनि होइनन् भन्ने सन्देश गएको छ । दुई दलका प्रमुख नेता, दुई नेताको सत्ता स्वार्थले मेरो विचारमा लाज पनि लजाएको छ । विश्वासमाथि पनि विश्वास छैन । जनतालाई एउटा वाचा गरेर काम अर्को गर्दा आउने पुस्ताले के सिक्ने तपाईंहरूबाट ? यसको प्रश्न सोध्दा जनतालाई अराजक देख्छ,” उनले भने ।
वर्तमान सरकार र दलहरूले जनतालाई सहज जीवनयापन नदिने भन्दै अध्यक्ष साहले तेस्रो जनआन्दोलनको आवश्यकता रहेको बताए ।
आम जनता पार्टीको केन्द्रीय समितिको बैठक मंगलबार र बुधबार चल्ने कार्यतालिका छ । बैठकले सडक आन्दोलनका कार्यक्रम तय गर्ने बताइएको छ ।
प्रतिक्रिया