काठमाडौँ । राष्ट्रिय सभा सदस्य बामदेव गौतमले नेपाल र भारतबिचको नाका खुल्ला भएका कारण आयात प्रतिस्थापन गर्न नसकिरहेको बताएका छन् ।
मंगलबार भएको विकास आर्थिक मामिला तथा सुशासन समितिको बैठकमा बोल्दै गौतमले आयात प्रतिस्थापन गर्न नसकेका कारण देशको आर्थिक क्षेत्रमा असर पुगेको बताएका हुन् ।
नेपालमै उत्पादित वस्तु प्रयोगमा जोड दिनुपर्ने उनले जोड दिए । ‘आयात बन्द गरौँ । उनीहरूले रोक लगाउँछन् भने सामना गरौँ । जति नेपालमा उत्पादन हुन्छ त्यसैले पुर्याऔँ । उताबाट नल्याऊँ,’ उनले भने ।
भारतबाट खुलेआम रूपमा आयात हुने तर भारततर्फ निर्यात गर्न असहज परिस्थिति रहेको उनको भनाई थियो । ‘त्यहाँका व्यापारीले नेपालबाट जाने वस्तुलाई भन्सारमा रोकिदिन्छ,’ उनले भने, ‘प्रक्रिया पुरा गर्न विहार जानुपर्छ । विहारबाट प्रक्रिया पुरा गर्दा कुहिन्छ ।’
तर बोर्डर खुल्ला हुँदा भारतबाट भने सहज रूपमा जस्तो वस्तु पनि आयात भइरहेको उनको जिकिर थियो । ‘बोर्डर खुल्ला भएर हाम्रो बजार बिग्रिएको छ । बोर्डर बन्द गरौँ। १५० देशसँग व्यापार सम्बन्ध छ, त्यसमध्ये ५ वटा मात्रै देशसँग नाफामा छ। अफ्रिकाबाट पनि आयात भइरहेको छ,’ उनले भने, ‘अफ्रिकासँग पनि देश व्यापार घाटामा छ ।’
उनले आत्मनिर्भर हुनका लागि उत्पादन बढाउनु पर्ने तथा बजार व्यवस्थित गर्नुपर्ने बताए । ‘प्रधानमन्त्री आएर बाचा गर्नुपर्यो, ६ महिनाभित्र आयात प्रतिस्थापन गर्न सक्छु भनेर होइन भने राजीनामा दिए हुन्छ,’ उनले भने ।
प्रतिक्रिया