काठमाडौं । शिक्षा, विज्ञान तथा प्रविधिमन्त्री सुमना श्रेष्ठले आफूले शिक्षक तर्साउने काम गरेको भन्ने हल्ला फैलाएको भन्दै आपत्ति जनाएकी छिन् ।
शुक्रबार राष्ट्रिय सभाको बैठकमा बजेटमाथि सांसदले उठाएका मन्त्रालयसँग सम्बन्धित प्रश्नको जवाफ दिँदै उनले शिक्षकहरुलाई राजनीतिक दलको सदस्यता त्याग्न र पार्टीको कार्यक्रममा नगई विद्यार्र्थीहरुलाई सहज रुपमा शिक्षा प्रदान गर्नु भन्दा तर्साएको कसरी भयो भन्दै प्रश्न गरेकी हुन् ।
उनले भनिन्, ‘शिक्षण पेसा भनेको जागिरको विषय होइन, दायित्व हो । उनीहरु जतिबेला पनि विद्यार्थीको सिकाइमा केन्द्रित हुनुपर्छ । शिक्षकहरुलाई दलको आवद्धता त्याग्नुस भनेको तर्साउने काम गरिएको भन्दै हल्ला फैलाइयो । शिषकलाई पार्टीका कार्यक्रममा नगई कक्षामा विद्यार्थीलाई सहज वातावरण बनाइदिनुस भन्दा कसरी तर्साएको भयो ?’
देशभरका नीजि र सरकारी विद्यालयको नतिजामा केही फरक नभएको भन्दै उनले शिक्षाको गुणस्तर निरन्तर ओरालो लागिरहेको बताईन् ।
‘सरकारी शिक्षकहरु राजनीतिक दलको जिम्मेवारी र सदस्यमा लागेर तालाबन्दी गर्ने, आन्दोलनमा गएर विद्यार्थीको भविष्यमाथि खेलबाड गरि नतिजा खस्किरहेको छ’ उनको भनाइ छ ।
यसैगरी, मन्त्री श्रेष्ठले प्राविधिक शिक्षा तथा व्यवसायिक तालिम परिषद्को पुनःसंरचाका लागि प्रक्रिया सुरु भएको जानकारी दिँदै विद्यार्थीले ‘सिक्दासिक्दै कमाउने’ र कमाउँदा कमाउँदै शैक्षिक प्रमाणपत्र पाउने अवस्था ल्याउन काम गरिरहेको बताइन् ।
प्रतिक्रिया