काठमाडौं- रसुवालगायत आठ जिल्लामा आएको बाढीपहिरोमा परी मृत्यु हुनेको सङ्ख्या १ हजार ३ सय ५५ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सोमबार बिहान ११ बजेसम्म ४ हजार ९ सय १६ जना अझै बेपत्ता छन्।
प्राधिकरणका अनुसार विपत्तिबाट चितवनमा ३ सय ६३, नवलपरासी पूर्वमा २ सय २२, नवलपरासी पश्चिममा २ सय २१, नुवाकोटमा १ सय ९७, रसुवामा १ सय ६९, गोरखामा ७५, धादिङमा ७० र तनहुँमा ३८ जनाको मृत्यु भएको छ।
सङ्कलन गरिएका शवमध्ये हालसम्म १८ जनाको मात्रै पहिचान गरी आफन्तलाई बुझाइएको प्राधिकरणले जनाएको छ। ठूलो सङ्ख्यामा शवको पहिचान हुन बाँकी रहेकाले मृतक तथा बेपत्ताको विवरण थप अद्यावधिक हुन सक्ने जनाइएको छ।
बेपत्ता हुनेमा रसुवा जिल्ला प्रशासन कार्यालयको विवरणअनुसार १ हजार ९ सय ६७ नेपाली, नुवाकोट जिल्ला प्रशासन कार्यालयको विवरणअनुसार २ हजार ३ सय ४० नेपाली, सुरक्षाकर्मी तथा कर्मचारी १ सय र विदेशी नागरिक ५ सय ८९ जना छन्। प्राधिकरणले बेपत्ताको विवरण प्रमाणीकरणको क्रममा रहेको जनाएको छ।
विपत्तिपछि उद्धार तथा राहत कार्य जारी रहेको छ। हालसम्म १३ हजार ३ सय १६ जनाको जीवितै उद्धार गरिएको छ। विपत्तिमा ६ हजार ६ सय ७२ जना घाइते भएकामा ३ सय २३ जना अस्पतालमा उपचाररत छन् भने २ सय २८ जना उपचारपछि डिस्चार्ज भएका छन्।
प्रतिकार्यमा नेपाल प्रहरी, नेपाली सेना र सशस्त्र प्रहरीका गरी २१ हजार ४ सय २ जना सुरक्षाकर्मी परिचालन गरिएको छ। नेपाल प्रहरीका ७ हजार ९ सय १२, नेपाली सेनाका ९ हजार २ सय ८७ र सशस्त्र प्रहरीका ४ हजार २ सय ३ जना सुरक्षाकर्मी उद्धार तथा राहतमा खटिएका छन्।
रसुवा, नुवाकोट र धादिङका ३९ वटा अस्थायी आश्रय केन्द्रमा ३ हजार ५ सय ३३ विस्थापितले आश्रय लिइरहेका छन्। रसुवामा भदौ २१ गते हेलिकप्टर तथा चार ट्रकमार्फत खाद्यान्न, स्वच्छता सामग्री र विद्यार्थीका लागि आवश्यक सामग्री पठाइएको प्राधिकरणले जनाएको छ।
स्वास्थ्य मन्त्रालयले प्रभावित क्षेत्रमा मनोसामाजिक परामर्शका लागि १ सय ५० जना जनशक्ति परिचालन गरेको छ।
भौतिक पूर्वाधारतर्फ पनि पुनःस्थापनाको काम अघि बढाइएको छ। विपत्तिपछि हालसम्म १ हजार ४ सय ७९ उडान भएका छन्। सोमबार मात्रै ३९ उडान भएका छन्। तीमध्ये नेपाली सेनाले १ हजार १ सय ५७ र निजी क्षेत्रले १ सय २९ उडान गरेका छन्।
विद्युत् सेवातर्फ रसुवामा ७८ प्रतिशत, नुवाकोटमा ९६ दशमलव ७ प्रतिशत र धादिङमा ९९ दशमलव ८ प्रतिशत घरधुरीमा विद्युत् सेवा पुनः सञ्चालन भएको छ। सञ्चारतर्फ नेपाल टेलिकमका १ सय २० मध्ये १ सय १७ र एनसेलका ७८ मध्ये ७६ वटा टावर सञ्चालनमा आएका छन्।
प्रभावित क्षेत्रमा ५८ हजार लिटर डिजेल, २५ हजार लिटर पेट्रोल र १३ हजार लिटर हवाई इन्धन मौज्दात रहेको प्राधिकरणले जनाएको छ।
सरकारले प्रभावित जिल्लाका लागि तत्काल नगद राहतसमेत घोषणा गरेको छ। रसुवा र नुवाकोटलाई १–१ करोड तथा धादिङलाई ५० लाख रुपैयाँ उपलब्ध गराउने निर्णय भएको छ। त्यस्तै, १५ प्रभावित पालिकाका लागि १३ करोड ५० लाख रुपैयाँ राहत उपलब्ध गराइने जनाइएको छ।
प्राधिकरणले मृतकको पहिचान तथा बेपत्ता नागरिकको खोजीलाई प्राथमिकतामा राखिएको जनाएको छ। विपत्तिसम्बन्धी आधिकारिक तथ्याङ्क नियमित रूपमा अद्यावधिक गरिने प्राधिकरणको भनाइ छ।
प्रतिक्रिया