साउदी, टर्की र पाकिस्तानबीचको रक्षा सम्झौताको ट्रम्पद्वारा स्वागत

काठमाडौं । अमेरिकी राष्ट्रपति डोनाल्ड ट्रम्पले साउदी अरेबिया, टर्की र पाकिस्तानबीच हालै भएको मक्का संयुक्त रक्षा सम्झौताको स्वागत गरेका छन् । उनले त्रिपक्षीय सुरक्षा सहकार्यलाई क्षेत्रीय सुरक्षा र आत्मनिर्भरतातर्फको महत्वपूर्ण कदमका रूपमा व्याख्या गरेका छन् ।

ट्रम्पले आइतबार आफ्नो सामाजिक सञ्जाल प्लेटफर्म ट्रुथ सोसलमा साउदी अरेबिया, टर्की र पाकिस्तानले अन्ततः सम्झौतामा हस्ताक्षर गरेकोमा आफू निकै खुसी भएको बताएका छन् ।

क्षेत्रीय सुरक्षा संरचनामा भइरहेको परिवर्तनतर्फ संकेत गर्दै ट्रम्पले मध्यपूर्व क्रमशः एकजुट हुँदै गएको र सम्बन्धित देशहरूले आफ्नो सुरक्षा आफैं प्रभावकारी रूपमा गर्न सक्ने अवस्था बन्दै गएको बताएका छन् । उनले सम्झौतालाई ‘ठूलो, साहसिक र महत्वपूर्ण पहिलो कदम’ समेत भनेका छन् ।

मक्का संयुक्त रक्षा सम्झौतामा साउदी युवराज तथा प्रधानमन्त्री मोहम्मद बिन सलमान, टर्कीका राष्ट्रपति रेसेप तैयप एर्दोगान र पाकिस्तानका प्रधानमन्त्री शहबाज सरिफले अगस्ट ७ मा मक्कामा औपचारिक रूपमा हस्ताक्षर गरेका थिए ।

सम्झौताले तीन देशबीच सामूहिक रक्षाका लागि संरचित संयन्त्र स्थापना गर्नुका साथै सैन्य तथा सुरक्षा सहकार्य विस्तार गर्ने व्यवस्था गरेको छ । सम्झौताअनुसार तीनमध्ये कुनै एक देशमाथि सशस्त्र आक्रमण भए त्यसलाई तीनै देशमाथिको आक्रमणका रूपमा लिइनेछ ।

साथै सैन्य समन्वय वृद्धि, संयुक्त सामरिक अभ्यास तथा रक्षा प्रविधि र सैन्य औद्योगिक क्षमतामा सहकार्य गर्ने प्रावधानसमेत सम्झौतामा समेटिएको छ । यो सम्झौता मध्यपूर्वमा क्षेत्रीय तनाव र सुरक्षा चिन्ता बढिरहेका बेला भएको हो । सम्झौताप्रति अन्तर्राष्ट्रिय चासो बढिरहेका बेला तीनै देशले भने यो सहकार्य प्रकृतिमा रक्षात्मक रहेको र कुनै सैन्य वा साम्प्रदायिक समूह निर्माण गर्ने उद्देश्य नरहेको स्पष्ट गरेका छन् ।

सम्झौताले इरान र अमेरिकाबीचको तनाव समाधान गर्न कूटनीतिक पहललाई सहयोग गर्ने प्रतिबद्धता पनि तीन देशले गरेका छन् । यसैबीच, टर्कीका राष्ट्रपति एर्दोगानले सम्झौतामा थप देश सहभागी हुन सक्ने संकेत गरेका छन् । उनले इजिप्ट पनि यस संरचनामा सहभागी हुने सम्भावना रहेको बताएका छन् ।

उनका अनुसार सम्झौताको संरचनाले भविष्यमा थप सदस्यलाई समेट्न सक्नेछ । सम्झौताको कूटनीतिक प्रभावबारे टिप्पणी गर्दै एर्दोगानले यसले विश्वलाई महत्वपूर्ण सन्देश दिएको दाबी गरेका छन् । नयाँ रक्षा सहकार्यले मध्यपूर्वमा क्षेत्रीय सुरक्षा संरचना र शक्ति सन्तुलनमा नयाँ आयाम थप्न सक्ने विश्लेषण गरिएको छ । एएनआई