क्रान्स मोन्टाना, स्विट्जरल्यान्ड – नयाँ वर्षको उत्सवका क्रममा स्विट्जरल्यान्डको प्रसिद्ध स्कि रिसोर्ट क्रान्स मोन्टानास्थित एक बारमा भएको शक्तिशाली विस्फोटमा कम्तीमा १० जनाको मृत्यु भएको छ भने अन्य १० जना गम्भीर घाइते भएका छन्।
वालिस क्यान्टन प्रहरीले जनाएअनुसार बिहीबार बिहान करिब १:३० बजे पर्यटकहरूबीच लोकप्रिय उक्त बारमा अचानक विस्फोट भएको हो। विस्फोटपछि बारमा आगलागी भएको थियो, जसका कारण ठूलो मानवीय तथा भौतिक क्षति पुगेको छ।
घटनाको जानकारी प्राप्त हुनासाथ प्रहरी, दमकल र आपतकालीन उद्धार टोली घटनास्थलमा परिचालित भएका थिए। विस्फोटका बेला बारभित्र फसेका व्यक्तिहरूलाई उद्धार गरी नजिकका अस्पतालहरूमा भर्ना गरिएको प्रहरीले जनाएको छ।
वालिस क्यान्टन प्रहरीका प्रवक्ता गेटन लेथियनले विस्फोटको कारण हालसम्म खुल्न नसकेको बताएका छन्। उनले घटनाबारे विस्तृत अनुसन्धान भइरहेको र सबै सम्भावित कोणबाट छानबिन भइरहेको जानकारी दिए।
नयाँ वर्षको अवसरमा बारमा ठूलो भीड रहेको प्रहरीको भनाइ छ। घटनापछि सुरक्षा कारण देखाउँदै आसपासका क्षेत्र सिल गरिएको छ र सर्वसाधारणको आवतजावतमा प्रतिबन्ध लगाइएको छ।
प्रहरीले घटनासम्बन्धी थप विवरण संकलन भइरहेको जनाएको छ।
प्रतिक्रिया