काठमाडौं। मेटाका प्रमुख कार्यकारी मार्क जुकरबर्गले यस वर्ष जुन महिनामा सुरु गरेको सुपर इन्टेलिजेन्स ल्याबमा हाल ११ जना वैज्ञानिक कार्यरत छन्। न्यूयोर्क टाइम्सले प्राप्त गरेको आन्तरिक मेमाका अनुसार यीमध्ये सात जना चिनियाँ नागरिक छन्, जबकि बाँकी चार जना भारत, बेलायत, दक्षिण अफ्रिका र अस्ट्रेलियाबाट आएका छन्।
अमेरिकामा लामो समयदेखि अधिकारी र विज्ञहरूले चीनलाई एआई क्षेत्रमा प्रमुख चुनौतीको रूपमा देखाउँदै आएका छन्। तथापि, अमेरिकी एआई अनुसन्धान धेरै हदसम्म चिनियाँ वैज्ञानिकहरूको सहयोगमा अगाडि बढिरहेको छ।
मेटा कम्पनीले यस वर्ष करिब ६ हजार ३०० एच–१बी भिसा पाएको छ। कम्पनीले सन् २०१८ पछिका कम्तीमा २८ अनुसन्धानपत्रहरू चिनियाँ संस्थासँग मिलेर तयार पारेको छ। अमेरिकी कम्पनीहरू जस्तै एप्पल, गुगल, इन्टेल र सेल्सफोर्स पनि चिनियाँ संस्थासँग महत्त्वपूर्ण अनुसन्धानमा संलग्न छन्।
सन् २०२० मा पल्सन इन्स्टिच्यूटले प्रकाशित गरेको अनुसन्धानले विश्वका शीर्ष एआई वैज्ञानिकहरूको करिब एक–तिहाई चीनबाट भएको देखाएको थियो। कार्नेगी एन्डोमेन्ट फर इन्टरनेशनल पिसको अध्ययनअनुसार सन् २०१९ मा अमेरिकी संस्थामा कार्यरत १०० शीर्ष चिनियाँ अनुसन्धानकर्तामध्ये ८७ जना अझै त्यहीँ कार्यरत छन्।
विशेषज्ञहरूले भनेका छन् कि अमेरिकी एआई उद्योगले चिनियाँ प्रतिभाबाट महत्वपूर्ण लाभ पाउँदै आएको छ। अमेरिका र चीनबीच प्रतिस्पर्धा भइरहे पनि दुवै देशको एआई क्षेत्रमा सहकार्य जारी छ।
सिलिकन भ्यालीमा केहीले चिनियाँ नागरिकहरूले अमेरिकी प्रविधि चीन सरकारलाई हस्तान्तरण गर्न सक्छन् भन्ने जोखिम देखाएका छन्। तर विशेषज्ञहरूका अनुसार यी जोखिमहरूको बाबजुद चिनियाँ अनुसन्धानकर्तासँग काम गर्दा अमेरिकी कम्पनीहरूलाई ठूलो फाइदा पुग्छ। जर्जटाउन विश्वविद्यालयकी हेलेन टोनरका अनुसार, प्रतिबन्धहरूले अमेरिकी एआई अग्रतालाई क्षति पुर्याउन सक्छ।
प्रतिक्रिया