काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमाले अध्यक्ष केपी शर्मा ओलीका कारण संविधान संसोधन हुन नसकेको आरोप लगाएका छन् ।
केन्द्रीय कार्यालय पेरिसडाँडामा आयोजित कार्यक्रममा बोल्दै प्रचण्डले आफूले दुई पटक संविधान संसोधनका लागि प्रयास गरेपनि ओलीले रोकेको आरोप लगाएका हुन् ।
‘मैले पहिले नै संविधान संशोधनको प्रस्ताव अघि सारेको थिएँ। संघीयता विरोधीहरूले संशोधन गर्न रोक लगाउने एमाले नेता केपी ओली नै हो’, उनले भने ।
प्रचण्डले अहिले पनि एमालेको केपी ओली गुट मधेस, महिला, जनजातिलगायत मुलुकको परिवर्तनको विरोधी भएको टिप्पणी गरे ।
परिवर्तनको रक्षा गर्दै जनताको हक, अधिकार स्थापित गर्नका लागि माओवादीलाई बलियो बनाउनुको विकल्प नरहेको उनको भनाइ छ ।
माओवादी कमजोर भयो भने संविधान मिच्ने च्यात्ने, गणतन्त्र नै उल्टाउन खोज्नेहरू सक्रिय हुने भन्दै प्रचण्डले राष्ट्रिय एकताको रक्षाको लागि माओवादीलाई बलियो बनाउनुको कुनै विकल्प नभएको जिकीर गरे ।
यसअघि पनि आफूहरूले प्रतिगमनलाई असफल बनाएको र परिवर्तनलाई उल्ट्याउन खोज्ने तत्वलाई बालुवाटारबाट निकालेर बालकोट पुर्याएको उनको भनाई रहेको थियो ।
प्रतिक्रिया